לשמח בני משפחתו - פרק צו

Update Required
To play the media you will need to either update your browser to a recent version or update your Flash plugin.



(א)
שִׁירוּ לַיהוָה שִׁיר חָדָשׁ שִׁירוּ לַיהוָה כָּל-הָאָרֶץ:

(ב)
שִׁירוּ לַיהוָה בָּרֲכוּ שְׁמוֹ בַּשְּׂרוּ מִיּוֹם-לְיוֹם יְשׁוּעָתוֹ:

(ג)
סַפְּרוּ בַגּוֹיִם כְּבוֹדוֹ בְּכָל-הָעַמִּים נִפְלְאוֹתָיו:

(ד)
כִּי גָדוֹל יְהוָה וּמְהֻלָּל מְאד נוֹרָא הוּא עַל-כָּל-אֱלֹהִים:

(ה)
כִּי כָּל-אֱלֹהֵי הָעַמִּים אֱלִילִים וַיהוָה שָׁמַיִם עָשָׂה:

(ו)
הוֹד-וְהָדָר לְפָנָיו עז וְתִפְאֶרֶת בְּמִקְדָּשׁוֹ:

(ז)
הָבוּ לַיהוָה מִשְׁפְּחוֹת עַמִּים הָבוּ לַיהוָה כָּבוֹד וָעז:

(ח)
הָבוּ לַיהוָה כְּבוֹד שְׁמוֹ שְׂאוּ מִנְחָה וּבאוּ לְחַצְרוֹתָיו:

(ט)
הִשְׁתַּחֲווּ לַיהוָה בְּהַדְרַת-קדֶשׁ חִילוּ מִפָּנָיו כָּל-הָאָרֶץ:

(י)
אִמְרוּ בַגּוֹיִם יְהוָה מָלָךְ אַף-תִּכּוֹן תֵּבֵל בַּל-תִּמּוֹט יָדִין עַמִּים בְּמֵישָׁרִים:

(יא)
יִשְׂמְחוּ הַשָּׁמַיִם וְתָגֵל הָאָרֶץ יִרְעַם הַיָּם וּמְלֹאוֹ:

(יב)
יַעֲלֹז שָׂדַי וְכָל-אֲשֶׁר-בּוֹ אָז יְרַנְּנוּ כָּל-עֲצֵי-יָעַר:
(יג)
לִפְנֵי יְהוָה כִּי בָא כִּי בָא לִשְׁפּט הָאָרֶץ יִשְׁפּט-תֵּבֵל בְּצֶדֶק וְעַמִּים בֶּאֱמוּנָתוֹ:
קראת? שתף חברים